מִזְמוֹר שִׁיר־חֲנֻכַּת הַבַּֽיִת לְדָוִד

מִזְמוֹר שִׁיר־חֲנֻכַּת הַבַּֽיִת לְדָוִד:

אֲרוֹמִמְךָ יְהֹוָה כִּי דִלִּיתָֽנִי וְלֹא־שִׂמַּֽחְתָּ אֹיְ֒בַי לִי:

יְהֹוָה אֱלֹהָי שִׁוַּעְתִּי אֵלֶֽיךָ וַתִּרְפָּאֵֽנִי:

יְהֹוָה הֶעֱלִֽיתָ מִן־שְׁאוֹל נַפְשִׁי חִיִּיתַֽנִי מִיָּרְ֒דִי־בוֹר:

זַמְּ֒רוּ לַיהוָֹה חֲסִידָיו וְהוֹדוּ לְזֵֽכֶר קָדְשׁוֹ:

כִּי רֶֽגַע בְּאַפּוֹ חַיִּים בִּרְצוֹנוֹ בָּעֶֽרֶב יָלִין בֶּֽכִי וְלַבֹּֽקֶר רִנָּה:

וַאֲנִי אָמַֽרְתִּי בְשַׁלְוִי בַּל־אֶמּוֹט לְעוֹלָם:

יְהֹוָה בִּרְצוֹנְ֒ךָ הֶעֱמַֽדְתָּה לְהַרְרִי עֹז הִסְתַּֽרְתָּ פָנֶֽיךָ הָיִֽיתִי נִבְהָל:

אֵלֶֽיךָ יְהֹוָה אֶקְרָא וְאֶל־אֲדֹנָי אֶתְחַנָּן:

מַה־בֶּֽצַע בְּדָמִי בְּרִדְתִּי אֶל שָֽׁחַת הֲיוֹדְ֒ךָ עָפָר הֲיַגִּיד אֲמִתֶּֽךָ:

שְׁמַע יְהֹוָה וְחָנֵּֽנִי יְהֹוָה הֱיֵה־עֹזֵר לִי:

הָפַֽכְתָּ מִסְפְּדִי לְמָחוֹל לִי פִּתַּחְתָּ שַׂקִּי וַתְּ֒אַזְּ֒רֵֽנִי שִׂמְחָה:

לְמַֽעַן יְזַמֶּרְךָ כָבוֹד וְלֹא יִדֹּם יְהֹוָה אֱלֹהַי לְעוֹלָם אוֹדֶֽךָּ:
0:00 / 0:00
volume_up
volume_off
1.0x

#45: פסוקי דזמרה Part 1 (Introduction)

#45: פסוקי דזמרה Part 2 (Introduction)

#46: פסוקי דזמרה Part 2 (Introduction)

#47: פסוקי דזמרה Part 3 (Introduction)

#48 – מזמור שיר חנוכת הבית לדוד (Part 1)

#49 – Pesukei D’Zimra: מזמור שיר חנוכת הבית לדוד (Part 2)

#50: Pesukei D’Zimra: מזמור שיר חנוכת הבית לדוד (Part 3)

#51: Pesukei D’Zimra: מזמור שיר חנוכת הבית לדוד (Part 4)

#52: Pesukei D’Zimra: מזמור שיר חנוכת הבית לדוד (Part 5)